Grímseyjarskóli

Grímseyjarskóli verður ekki starfandi í vetur.

Góðan daginn og gleðilegt ár!

Það sem af er ári hefur verið nóg að gera hjá okkur, mikið um gestanemendur í báðum deildum og mikið stuð.

Skólinn hófst eftir jólafrí með námsmati og viðtölum. Gullfiskurinn Salka fékk félaga, meira að segja tvo, en hvorugur lifði af til lengdar umskiptin frá Dýraríkinu í kúluna í Grímseyjarskóla. Enn ein tilraun til félagakaupa verður gerð í næstu landferð skólastjóra.

Óvenjumikill snjór hefur verið í eyjunni og nýttu leikskólabörnin sér það til hins ýtrasta. Við erum samt sem áður farin að sjá lunda í bökkunum og jafnvel kríuna í hillingum.

Hefðin í Grímsey er að aðfaranótt Bolludags ganga börn á skólaaldri um eyjuna og bolla þá sem skilja eftir ólæst og fá að launum sælgæti. Venjulega þurfa þau að hafa í huga að vera komin í húsin áður enn sjómenn vakna en í ár var bræla svo óhætt var að fara seinna af stað. Á  Bolludag sjálfan er svo frí í skólanum, svona svo krakkarnir geti legið á meltunni.

Öskudagurinn er alltaf vinsæll í Grímsey og mörg börn sem eiga ekki vetursetu í eynni sem koma og taka þátt. Það er samstarsverkefni allra eyjaskeggja að dagurinn gangi vel og skemmtilega.

Nemendur og gestanemendur mættu í skólann á venjulegum tíma að morgni en fengu svo að fara heim um miðjan morgun að undirbúa búninga. Allir mættu svo tilbúnir um hádegi og eftir myndatökur var lagt stað niður í ferju þar sem byrjað var að syngja fyrir áhöfnina og svo áfram í önnur fyrirtæki. Þrátt fyrir mokfiskerí gáfu allir sér tíma til að stöðva vinnu í smástund til að hlusta á söng. Söngferðalaginu lauk í útgerðinni Sigurbirninum að venju þar sem kiwanisklúbburinn Grímur stóð fyrir kettinum í tunnunni. Tunnudrottning öskudagsins 2019 var Helga Hrund Þórsdóttir í 9. bekk og hlaut hún að launum 5000 kr. frá kiwanisklúbbnum. Þegar allir höfðu hent sér á nammið úr tunnunni héldu allir suður í skóla þar sem kvenfélagið Baugur var með tilbúið pylsuhlaðborð til að ljúka þessum skemmtilega degi.

Að öðru leiti gengur allt sinn vanagang með bóklegu og verklegu námi og svo að sjálfsögðu samræmdu könnunarprófunum sem lauk í dag.

Í næstu viku er svo heilsuvika í Grímseyjarskóla. Boðið verður upp á hafragraut í fyrstu frímínútum og unglingarnir fræddir um heilsu, hreysti og næringu. Svo er bara ótrúlega stutt í páskafrí, tíminn líður svo hratt (mögulega finnst nemendum það síður en mér 😉 )!

Þangað til næst, hafið það gott!

Síðasti skóladagur fyrir jólafrí er upprunnin, við mikla ánægju allra 🙂

Þann 13. desember héldum við skólafólk dag heilagrar Lúsíu hátíðlegan, en það er hefð sem hefur verið við lýði í á þriðja áratug. Þetta er notalegt aðventukvöld þar sem öllum eyjarskeggjum er boðið að horfa á krakkana flytja atriði og njóta jólaveitinga. Í þetta sinnið, auk hins hefðbundna Lúsíulags í byrjun, sýndu nemendur kennaragrín og spiluðu á gítar.

Við græddum skólagæludýr á dögunum. Ein móðirin kom færandi hendi með hana Sölku sem hefur fengið dekurmeðferð frá fyrsta degi. Ef vel gengur gæti hún einast félaga bráðlega. Og engar áhyggjur, hún fær jólamatinn sinn – búið er að gefa út umsjón í jólafríinu!

Aðventan hefur svo gengið fyrir sig með hefðbundnum skóladögum með vaxandi jólaföndri eftir því sem nær hefur dregið jólum. Ein af hefðunum (og samfélagsleg skylda okkar) er að skreyta hinn svokallaða klukkuvegg í skólanum/félagsheimilinu þar til hann verður að jólavegg. Skreytingin er með óhefðbundnara móti í ár en hún er hugmynd nemenda að öllu leiti. Salka fékk að sjálfsögðu að vera með.

Grímseyjarskóli er umhverfisvænn skóli og í gær fórum við í Búðina með fjölnota poka sem nemendur og kennarar hafa verið að framleiða á önninni, sumir saumaðir í skólanum og aðrir keyptir og skreyttir. Þar með er komin upp pokastöð í Búðinni þar sem viðskiptavinir geta fengið lánaða fjölnota poka ef þeir gleyma sínum heima. Svo skila þeir bara næst – ætli það verði ekki bannað að taka þá með í land 😉

Ein þrælfersk hópmynd í Búðinni af nemendum, kennurum og einum gestanemanda, auk Unnar kaupmanns, við afhendingu pokanna. Á myndina vantar einn grunnskólanema og einn leikskólanema.

Karen Sigurðardóttir í Hátúni var fyrsti viðskiptavinurinn til að fá lánaðan poka. Unnur Ingólfsdóttir kaupmaður afgreiðir. Myndin er að sjálfsögðu alls ekkert sviðsett.

Seinni partinn í dag höldum við svo Litlu-jólin okkar og hver veit nema skeggjaðir óeirðaseggir komi í heimsókn og dragi okkur einn hring í kringum jólatréð 😉

 

Gleðileg jól öll sömul og takk fyrir önnina. Sjáumst úthvíld á nýju ári!

Önnin líður hraðar en við gerum okkur grein fyrir og allt í einu er að líða að lokum nóvember.

Í lok október heimsóttum við vini okkar í Hríseyjarskóla og eyddum með þeim einni skólaviku, svokallaðri Sudbury viku. Nemendur fundu sér viðfangsefni, undirbjuggu áætlanir og unnu eftir þeim. Það var prjónað, spilað á gítar, eitthvað unnið í námsbókum og ýmislegt fleira áhugavert. Heimsókninni lauk með kvöldvöku unglingadeildar og svo tók við góð helgi hjá fjölskyldum á Akureyri áður en haldið var heim.

Þann 11. nóvember ár hvert höldum við Grímseyingar upp á þjóðhátíðardag okkar. Sá dagur er afmælisdagur velgjörðarmanns okkar, Daniel Willard Fiske. Hefð er fyrir því að grunnskólanemendur sjái um skemmtiatriði á hátíðinni og þetta árið var búið að taka upp og klippa myndband á Ipad. Vegna tækniegra örðugleika (og mögulega klaufaskaps skólastjórans) reyndist ekki unnt að sýna það á hátíðinni en við stefnum á að sýna það á Lúsíunni, 13. desember, í staðinn.

Annars er ótrúlega stutt í jólafrí en þangað til höldum við okkar striki að mestu, nemum, kennum og njótum.

Þá er kominn október og opinberlega haust. Haustönnin að verða hálfnuð og aðeins tvær vikur í að við kíkjum í heimsókn til vina okkar í Hríseyjarskóla í þriðja skiptið.

Við erum að vinna í því að setja myndir inn á síðuna, hvoru tveggja nýgamlar og eldgamlar. Inni í flipanum Gamlar myndir sem er að finna undir flipanum Skólastarf eru komnir inn nokkrir hlekkir á Google albúm og munu halda áfram að bætast við hlekkir. Stefnan er svo að búa til annan flipa á síðunni fyrir nýrri myndir.

Fyrir ykkur sem viljið stytta ykkur leið er hér hlekkur: Gamlar myndir

Njótið!

Nú er rúmlega mánuður búinn af skólanum og framleiðslan farin á fullt. Listgreinaverkefnin í vetur verða af ýmsu tagi og hér má sjá smá sýnishorn.

 

Skólastarf Grímseyjarskóla fer vel af stað þetta haustið. Þrír nemendur eru í grunnskóladeild og tveir í leikskóladeild. Það er fámennt en góðmennt hjá okkur og andinn eftir því. September einkennist af hefðbundnu skólastarfi; vinnustundum, samfélagsfræði, listgreinum og íþróttum.

Í október er stefnan hins vegar tekin á að heimsækja vini okkar í Hríseyjarskóla þar sem við höldum sameiginlega Sudbury viku, en Sudbury er bresk skólastefna þar sem nemendur ráða námi sínu sjálfir að miklu leiti.